სახალხო დამცველის რეკომენდაცია საქართველოს სასჯელაღსრულების, პრობაციისა და იურიდიული დახმარების საკითხთა მინისტრს

14 05 2012

,,საქართველოს სახალხო დამცველის შესახებ“ საქართველოს ორგანული კანონის 21-ე მუხლის ,,ბ“ ქვეპუნქტის თანახმად,   სახალხო დამცველმა რეკომენდაციით მიმართა საქართველოს სასჯელაღსრულების, პრობაციისა და იურიდიული დახმარების საკითხთა მინისტრს    დაუყოვნებლივ უზრუნველყოს  პატიმარ პ.კ.-ს გადაყვანა #18 ბრალდებულთა და მსჯავრდებულთა სამკურნალო დაწესებულებაში, ვინაიდან     გლდანის #8 დაწესებულებაში არსებული პირობები არ არის ადეკვატური მისი სათანადო მკურნალობისა და მოვლისათვის.
 
2012 წლის 30 აპრილს საქართველოს სახალხო დამცველის რწმუნებული ესაუბრა #8 დაწესებულებაში განთავსებულ პატიმარს პ. კ.-ს. პატიმრის გადმოცემით, 2002 წელს მან ქალა-ტვინის არეში მიიღო ცეცხლნასროლი ჭრილობა, რის შემდეგ იგი დამოუკიდებლად ვერ გადაადგილდება. მისივე განმარტებით, იგი იძულებულია, ბუნებრივი მოთხოვნილებების დასაკმაყოფილებლად დახმარება სთხოვოს თანასაკნელებს. პ.კ.-ს განცხადებით, #8 დაწესებულებაში იგი უზრუნველყოფილი არ არის ინვალიდის ეტლით, შეზღუდული შესაძლებლობის მქონე პირისათვის აუცილებელი  საშუალებებით და გარემოთი და ითხოვს #18 ბრალდებულთა და მსჯავრდებულთა სამკურნალო დაწესებულებაში გადაყვანას.
 
საქართველოს სახალხო დამცველის აპარატში წარმოდგენილი იქნა ასევე დამოუკიდებელი სასამართლო ექსპერტიზის ცენტრის შპს ,,ვექტორის“ მიერ პ. კ.-ს მიმართ ნაწარმოები ალტერნატიული კომისიური სასამართლო-სამედიცინო ექსპერტიზის დასკვნა, რომელიც ადასატურებს, რომ პ. კ.-ს დგომა და სიარული შეუძლია მხოლოდ დამხამრე საშუალებებით.